Fafaroma Francis ya na shirin ƙaddamar da sabuwar shekara mai tsarki ta mabiya Katolika a yau, wadda ake gudanarwa sau ɗaya a kowace shekara 25, bisa al’ada.
Bikin na bana zai fara ne da Fafaroma ya buɗe wata ƙofa mai tsarki a St. Peter’s Basilica, fadarsa, a matsayin wani ɓangare na shirye-shiryen addu’o’in jajibirin Kirsimeti.
An yi hasashen cewa fiye da miliyan 30 daga cikin mabiyan Katolika za su halarci wannan biki a birnin Rome.
A sakamakon haka, mahukuntan birnin sun dukufa wajen gyara manyan tituna da wuraren tarihi don karɓar dubban baƙin da za su halarta.
A al’adar Katolika, mabiyan na da imanin cewa shiga ta ƙofar mai tsarki da za a buɗe na iya share zunubai.