Gwamnan Jihar Kano, Abba Kabir Yusuf, a cikin sabuwar shekara ta 2025, ya yaba da jajircewar al’ummar jihar wajen shawo kan kalubalen talauci, yunwa, da kunci da suka shafi jihar a shekarar 2024.
Gwamnan, a cikin sakon sabuwar shekararsa, ya tabbatar da cikakken goyon bayansa wajen kawo ci gaba mai ma’ana da warware matsalolin talauci da yunwa a cikin shekarar 2025.
Ya tura gaisuwar sabuwar shekara ga al’ummar jihar, da ma wadanda ke kasashen waje, yana mai fatan cewa sabuwar shekara za ta kawo haske da ci gaba mai dorewa.
Hakan na cikin wata sanarwa da mai magana da yawun gwamnan, Sunusi Bature Dawakin Tofa, ya fitar a ranar Laraba.
“Sabuwar Shekara Mai Dadi ga mutanen Jihar Kano. Allah ya sa 2025 ta kawo mana zaman lafiya, ci gaba, da karin hada kai,” in ji Gwamnan, yana mai alkawarin aiki tukuru don inganta rayuwar kowanne dan kasa a jihar.